دوڭگەلەك ۇستەل استانا قالاسى ءماسليحاتىنىڭ توراعاسى تابيعات قابدەن ۇلى زەينۇلقابدەننىڭ قۇتتىقتاۋ سوزىمەن اشىلدى. ءماسليحات توراعاسى جاڭا زامان تالابىنا ساي جۇمىس ىستەپ وتىرعان اقپارات قۇرالىنىڭ قىسقا ۋاقىت ىشىندە قوعامنان ءوز ورنىن العانىن اتاي كەلە, شىعارماشىلىق ۇجىمعا العىسىن ءبىلدىردى. قر مادەنيەت جانە اقپارات مينيسترلىگى ءدىن ىستەرى كوميتەتىنىڭ باسقارما باسشىسى جاپال امزەبەك ۇلى راديوارنانىڭ ءوز ماقساتىنا ساي, كاسىبي تۇردە حابار تاراتىپ وتىرعانىن باسا ايتتى.
باس باياندامانى «ALQA» راديوسىنىڭ باس رەداكتورى سەرىك سەيىتمان جاسادى. باياندامادا راديوارنانىڭ كەشەگى, بۇگىنگى جاعدايى مەن بولاشاققا جوسپارى جان-جاقتى تانىستىرىلدى. جۇمىستىڭ نولدەن باستالعانىن اتاپ وتكەن باس رەداكتور ءبىر جىلدىڭ ىشىندە راديونىڭ اتىن قويۋدان باستاپ, ستۋديانى جاساقتاۋ, زاماناۋي قۇرىلعىلارمەن جابدىقتاۋ, كاسىبي مامانداردى تارتۋ, رۋحاني-اعارتۋشىلىق باعىتتاعى باعدارلامالار اشۋ, باعدارلامالار كەستەسىن قۇرۋ, يميدجدىك روليكتەر مەن اندەر قورىن قاىپتاستىرۋ, الەۋمەتتىك جەلىلەردەگى جۇمىستى جولعا قويۋ, موبيلدىك قوسىمشا, رەسمي سايتتى ىسكە قوسۋ سەكىلدى سان سالالى جۇمىستاردىڭ تياناقتى جۇيەلەنگەنىن باياندادى:
«2024 جىلدىڭ 10 ماۋسىمىندا قازاقستان رەسپۋبليكاسىنىڭ مەملەكەتتىك انۇرانىمەن ەفيردەگى جۇمىسىمىزدى باستادىق. قىزىقتى قاراڭىز, اراعا 18 كۇن سالىپ – 28 ماۋسىمداعى جۋرناليستەردىڭ كاسىبي مەرەكەسىندە پرەزيدەنتىمىز قاسىم-جومارت توقاەۆ جيىرماسىنشى عاسىر باسىنداعى قازاق زيالىلارىنىڭ باسپاسوزگە تۇگەل اتسالىسىپ, بۇل سالاعا اعارتۋشىلىق سيپات بەرگەنىن اتاپ ءوتتى. جانە اعا بۋىننىڭ سارا جولىن لايىقتى جالعاستىرۋ قاجەت ەكەنىنە ايرىقشا توقتالدى. بۇل – الاشتىڭ اماناتىن ارقالاعان «القا» راديوسىنىڭ اتى دا, زاتى دا مەملەكەتتىك ماڭىزعا يە دەگەن ءسوز!».
«وسى ورايدا ءبىزدىڭ youtube ارنامىزداعى باعدارلامالارىمىزعا وتاندىق ەكى تەلەارنانىڭ ىقىلاسى اۋىپ وتىرعانىن اتاپ وتەيىن. باسشىلارى بىزگە شىعىپ, ەفيرىمىزگە قويساق دەگەن ۇسىنىس ايتقانىنا ءبىراز بولدى. ال ولارعا كەلىسىم بەرۋ جاعى زاڭگەرىمىز بەن شىعارماشىلىق كەڭەستىڭ الداعى شارۋاسى دەپ بىلەمىن», – دەي كەلىپ, راديوارنانىڭ بولاشاقتاعى جوسپارىمەن دە ءبولىستى:
«الدا تولقىننان جيىلىك الۋ جوسپارىمىز بار. جاڭالىقتار قىزمەتىن ىسكە قوسۋ, اقپاراتتىق رەپورتاجدار تاراتۋ, تىڭدارماندارمەن تىكەلەي ەفيردە كەرى بايلانىس ورناتۋ سەكىلدى راديوارنانى جانرلىق جاعىنان تۇلەتۋ ءىسى دە سول كۇندەردىڭ ەنشىسىندە دەپ بىلەمىن. بۇل – قارجى مەن قاجىردى ءتيىمدى جۇمساۋعا بايلانىستى قۇرىلعان ستراتەگيالىق دامۋ باعدارلامامىزدىڭ ۇتىمدى تۇسى».
قازاق راديوسىنىڭ ارداگەرلەرى, داڭقتى ديكتورلار ساۋىق جاقانوۆا مەن امانجان ەڭسەباي ۇلى شاراعا قۇرمەتتى قوناق رەتىندە شاقىرىلدى. ولار ءداستۇر مەن جاڭاشىلدىققا بايلانىستى ءوز تاجىريبەلەرىمەن ءبولىستى, «ALQA» راديوسىنىڭ جۇمىسىن وتە جوعارى باعالاپ, ءىزباسارلارىنا اق باتاسىن بەردى.
استانا قالاسى ءماسليحاتىنىڭ دەپۋتاتتارى مەن قالالىق قوعامدىق كەڭەس مۇشەلەرى, باسقارما باسشىلارى مەن سالا ماماندارى جانە زيالى قاۋىم وكىلدەرى اقپارات پەن اعارتۋشىلىق تاقىرىبىندا كاسىبي پىكىرلەرىن ورتاعا سالدى. ولاردىڭ قاتارىندا استانا قالاسى اكىمدىگىنىڭ ءدىن ىستەرى جونىندەگى باسقارما باسشىسى قايروللا كوشقالي جانە قوعام قايراتكەرلەرى سەرىك تاۋكەباەۆ, تولەگەن قۋانىشەۆ, قانات ەستەك, الاشتانۋشى عالىمدار ايگۇل ىسماقوۆا, قايرات ساق, بەلگىلى ءدىن مامانى نۇرلان بايجىگىت ۇلى بار.
ونەر زەرتتەۋشىلەرى, داۋلەسكەر كۇيشىلەر ايتجان توقتاعان مەن احات بايبوسىنوۆ كۇيدەن قوناقكادە ۇسىنىپ, ءانشى-اكتريسا التىناي نۇربەك تامىلجىتا ءان شىرقادى. شارا اياسىندا اسحات بوزىمباي مەن گاۋھار قاناتباي باستاعان قولونەر شەبەرلەرىنىڭ كوشپەلى كورمەسى ۇيىمداستىرىلىپ, تەاتر جانە كينو اكتەرى ءادىل احمەتوۆ, رەكوردشى تەمىر سىپاتاي ءوز ونەرلەرىن ورتاعا سالدى. اتالعان ونەرپازداردىڭ ءبارى «ALQA» راديوسىنىڭ باعدارلاما جۇرگىزۋشىلەرى.
رۋحاني-تانىمدىق «ALQA» راديوسى 2024 جىلدىڭ 4 ماۋسىمى – قازاقستان رەسپۋبليكاسىنىڭ مەملەكەتتىك رامىزدەرى كۇنىندە سالتاناتتى تۇردە تانىستىرىلىپ, 10 ماۋسىم كۇنى تاڭعى ساعات 6:00-دە قازاقستان رەسپۋبليكاسىنىڭ مەملەكەتتىك انۇرانىمەن ەفيردەگى جۇمىسىن باستادى.
«ALQA» راديوسى ءدىني ەكسترەميزم مەن تەرروريزمگە قارسى ۇگىت-ناسيحات جۇمىستارىن جۇرگىزۋ ماقساتىندا: ءتول مادەنيەتىمىزدى, ءداستۇرلى ءدىنىمىزدى, تاريحىمىزدى, ءداستۇرىمىزدى جانە ءتولتۋما ونەرىمىزدى ناسيحاتتاۋعا باعىتتالعان تانىمدىق باعدارلامالاردى تاراتادى. قازاقستاننىڭ زايىرلى مەملەكەت ەكەنىن, مەملەكەت قۇرۋشى قازاق حالقىنىڭ ءتول دۇنيەتانىمى مەن تۇرمىس-سالتىن, سالت-ءداستۇرىن شىنايى تۇردە ناسيحاتتاۋدى, وتاندىق جانە شەتەلدىك راديوتىڭدارماندارعا قازاق ەلىن بەيبىتسۇيگىش مەملەكەت رەتىندە تانىتۋ, ەل ازاماتتارى مەن ەلوردا تۇرعىندارىن ىزگىلىك پەن يماندىلىققا شاقىرۋ, قازاقتىڭ باي مۋزىكالىق مۇراسى ارقىلى ۇلتىمىزدىڭ رۋحاني جانە اقپاراتتىق كەڭىستىگىن ساپالى دۇنيەلەرمەن تولتىرۋدى كوزدەگەن اقپارات قۇرالىنىڭ حابار تاراتا باستاعانىنا 2025 جىلدىڭ 10 ماۋسىمىندا 1 جىل تولدى.
"ALQA" راديوسى قۇرىلىمدىق جۇيە بويىنشا ءدىن ىستەرى جونىندەگى باسقارماعا قارايدى. باسقارما باسشىسىنىڭ پىكىرىنشە باستاپقىدا جوبا رەتىندە جۇمىسىن باستاعان اقپارات قۇرالى قازىر كاسىبي مامانداردىڭ ارقاسىندا شىعارماشىلىق ۇجىم بوپ قالىپتاستى.
